 |
सम्बन्ध विच्छेद गर्नेमा बढीजसो १८ देखि २५ वर्ष उमेर समूहका
कलिलै उमेरमा गरेको ‘प्रेम विवाह’ व्यवस्थापन गर्न नसक्दा सम्बन्धमा दरार
भाद्र १०, २०७३- धेरै जोडी मिलन हुनासाथ सँगै बाँच्ने/मर्ने कसम खान्छन् । केही समयको प्रेमपछि दाम्पत्य जीवनमा बाँधिन्छन् । तर, सबैको कसम लामो समय टिक्दैन । केही छिट्टै विछोड रोज्छन् । कपिलवस्तुको वाणगंगा १५ की अमृताले दुई वर्ष प्रेममा बिताएपछि स्थानीय युवकसित विवाह गरिन् । दुवैले यसलाई प्रेमको सफलता ठाने तर खुसी ४ वर्ष नपुग्दै टुक्रियो । घर भित्रिएपछि पतिले शारीरिक र मानसिक यातना दिन थाले । दिनहुँ झगडा हुन थाल्यो । यस्तो तनावमा बाँच्नुभन्दा अमृताले सम्बन्धमा ‘ब्रेक’ लाउने निर्णय गरिन् । छुट्टिने निर्णयलगत्तै जिल्ला अदालतमा सम्बन्ध विच्छेदको मुद्दा दायर गरिन् ।
वाणगंगा ३ की शशीले स्थानीय २५ वर्षीय युवकसित मागी विवाह गरिन् । उनीहरूको सम्बन्ध लामो समय टिकेन । परिवारबाट राम्रो व्यवहार नपाएपछि छुट्टै बस्ने निर्णयमा पुगिन् । तीन वर्षमै उनको वैवाहिक जीवन टुंगियो । घरेलु हिंसाको सिकार हुन थालेपछि महिलाले दाम्पत्य जीवनको पीडाभन्दा विछोड रोज्न थालेका छन् । अहिले दिनहुँ जिल्ला प्रहरीको महिला सेलमा यस्ता हिंसापीडितको भीड देखिन्छ । प्रहरीले दम्पतीबीच मिलापत्रको कोसिस गर्छन् । नसके सम्बन्ध विच्छेदका लागि अदालत पठाउँछन् ।
कपिलवस्तुमा आव २०७२/०७३ मा १ सय २० ले सम्बन्ध विच्छेद रोजेका छन् । ४ वर्षको तथ्यांक हेर्दा यसको संख्या २ गुणाले बढेको छ । आव ०७१/७२ मा १ सय १६ ले सम्बन्ध टुंग्याएका थिए । त्यसअघि ०७०/७१ मा ९० र ०६९/७० मा ५८ ले सम्बन्ध विच्छेद गराए । सम्बन्ध विच्छेद गर्नेमा बढीजसो १८ देखि २५ वर्ष उमेर समूहका छन् । कलिलै उमेरमा गरेको ‘प्रेमविवाह’ व्यवस्थापन गर्न नसक्दा सम्बन्ध टुट्ने गरेको हो । ‘७५ प्रतिशत प्रेमविवाह गरेका जोडी विच्छेद गर्न आउँछन् ।’ जिल्ला अदालतका नासु चोपलाल पाण्डेले भने, ‘युवकले प्रेमका बेला बाँडेका सपना पूरा नगर्दा समस्या बढिरहेको छ ।’
जीवनभर साथ दिने बाचा गरेका मकवानपुरका दम्पतीले पनि बर्सेनि विछोड रोजिरहेका छन् । यसरी सम्बन्ध टुंग्याउनेको संख्या बर्सेनि बढदो छ । मकवानपुर जिल्ला अदालतमा आव ०७२/०७३ असार मसान्तसम्म २ सय २४ थान सम्बन्ध विच्छेदका मुद्दा जिल्ला अदालतमा दर्ता भए । तीमध्ये १ सय ७५ को किनारा लागिसक्यो । ४९ थान टुंग्याउन बाँकी रहेको स्रेस्तेदार अनन्तराज मरासिनीले बताए । विछोडका लागि आएका अधिकांश निवेदन महिलाका छन् । समाजशास्त्रका प्रध्यापक वीरेन्द्र साह सम्बन्ध विच्छेदलाई आत्मनिर्भरता र स्वतन्त्रतासँग मात्र जोडेर हेर्न नमिल्ने बताउँछन् ।
‘सम्बन्ध विच्छेदपछि महिला र पुरुष स्वतन्त्र होलान्,’ उनले भने, ‘तर उनीहरूबाट जन्मेका बालबालिकाले अभिभावकको संरक्षकत्व गुमाउँछन् ।’ रेमिट्यान्सको प्रभाव, आफैं निर्णय गर्न सक्ने महिलाको संख्या बढेको र परम्परागत पुरुष संरचनाको निरन्तरताले यस्तो संख्या बढेको प्राध्यापक साह बताउँछन् ।
घरबार उजाडिँदै
चितवनको भरतपुर १६ का भक्तहादुर भुजेल कतार गएको १८ महिना भयो । धन कमाएर परिवार सुखी बनाउने सपना डेढ महिनाअघि श्रीमतीको हत्यासँगै तुहियो । उनकी श्रीमती ३० वर्षीया रीताको पोखरा बसपार्कस्थित होटल कलशमा धादिङ गम्दी ९ का २६ वर्षीय हेमबहादुर थापामगरले हत्या गरेका थिए । उनीहरू तीन दिन होटलमा सँगै बसे । रीताले विवाह नभएको बताउँदै ती युवकसँग सम्बन्ध गाँसेकी थिइन् । प्रहरी अनुसन्धानबाट थापामगर विदेशमा रहेका बेला रीतासित फेसबुकबाट प्रेम बसेको थियो । च्याटमा रीताले अविवाहित भएको बताइन् । हेमले राखेको नेपाल फर्केपछि जापान जाने प्रस्ताव राखे । रीताले स्वीकारिन् । हेमले रीतालाई विदेशबाट केही रकम र सामान पठाए । नेपाल आएपछि एक छोराकी आमा रहेको र पति विदेशमा भएको जानकारी गराइन् । उनीहरूबीच आर्थिक लेनदेनका विषयमा भएको विवादमा रीताको ज्यान गुम्यो ।
त्यस्तै, २०७२ पुस १७ मा भरतपुर ७ का त्रिभुवन काफ्लेले श्रीमती जमुनाको हत्या गरे । वैदेशिक रोजगारीबाट फर्केपछि परपुरुषसँगको सम्बन्धकै विषयलाई लिएर उनले जमुनाको हत्या गरेको खुलेको थियो । हत्यापछि काफ्लेले प्रहरीमा आत्मसमर्पण गरेका थिए । पछिल्लो समय जिल्लामा पति विदेशमा भएको मौका छोपी परपुरुषसित सम्बन्ध राख्ने बढेका छन् । पति मुलुकबाहिर रहेका बेला दोस्रो बिहे गर्ने, प्रेमसम्बन्ध गाँस्ने बढेका हुन् । यही कारण धेरैबीच सम्बन्ध विच्छेद हुने गरेको छ । जिल्ला प्रहरीको महिला तथा बालबालिका सेवा केन्द्रमा गत आवमा १ सय ९७ महिला हराएको उजुरी परेको थियो । तीमध्ये धेरैका पति वैदेशिक रोजागरीमा छन् । ‘विदेशबाट कमाएर घरपरिवारलाई सुख दिने सपना बोकेका धेरैको घर उजाडिएको छ,’ एसपी वसन्त कुँवरले भने ।
यौन विचलन
रून्देहीको दयानगर ५ चिलियाका ५८ वर्षीय बलराम पोखरेलले देवरभाउजूबीच यौन सम्बन्धको आशंकामा श्रीमती र भाइको हत्या गरे । भाइ र श्रीमतीलाई गत जेठ ११ को राति आपत्तिजनक अवस्थामा भेटेपछि इँटाले प्रहार गरको उनले बयान दिए । घाइते दुवैको भैरहवास्थित मेडिकल कलेजमा उपचारका क्रममा मृत्यु भएको हो । पत्नी कृष्णकुमारी र भाइ चन्द्रकान्त दुवै ५४ वर्षका हुन् । चन्द्रकान्तले बुटवल १४ तामनगरमा साइकल व्यवसाय गर्दै आएका थिए । उनकी पत्नी वैदेशिक रोजगारी क्रममा २ वर्षदेखि मलेसियामा थिइन् । भाइले माफी मागे पनि पत्नी नबोलेकाले आवेशमा आएर आक्रमण गरेको हत्या आरोपी बलरामले बताए ।
गत वैशाख २२ मा पतिको हत्या गरेको आरोपमा पड्सरी ८ की १९ वर्षे अस्मिता थापालाई प्रहरीले पक्राउ गर्यो । पतिले दिनहुँ मदिरा सेवन गरेर यौन यातना दिने गरेकाले हत्या गरेको बयान दिइन् । विजय र अस्मिताबीच एक वर्षअघि फेसबुकबाट चिनजान भएको थियो । उनीहरूले गत पुसमा बिहे गरेका थिए । बिहेपछि उनीहरूबीच झगडा सुरु भएको थियो । रूपन्देही प्रहरीका अनुसार गत आव ३२ वटा यौन हिंसाविरुद्धका मुद्दा दर्ता भएका थिए । त्यसमध्ये २० बलात्कार र १२ यौन हिंसाका छन् ।
हिंसापीडित पुरुष बढे
कपिलवस्तु लालपुरका एक ४७ वर्षीय युवकले श्रीमतीले एक महिनादेखि खान नदिएर भोकै बस्दा बिरामी भएको भन्दै जिल्ला प्रहरीमा उजुरी दिए । परसोहियाका अर्का एक जनाले पनि श्रीमतीले माइतीको धाक देखाउँदै दुव्र्यवहार गर्दै आएको उजुरी दिए । आफूलाई श्रीमान्जस्तो व्यवहार नगर्ने भन्दै घरमा बस्न गाह्रो भएको उनको गुनासो थियो ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon