 |
भाद्र ४, २०७३- बजार अभाव र लामो समय भण्डारण गर्ने प्रविधि नहुँदा जिल्लामा उत्पादित स्याउ बारीमै कुहिन थालेको छ ।
जिल्लाका काँडा, दंगाजी, पारकाट्ने, दहबगर, कैलाशलगायत गाविसमा उत्पादन भएका स्याउ बिक्री नभएर कुहिन थालेका छन् । ‘एक दानाको एक रुपैयाँमा दिए पनि बिक्री हुँदैन,’ दंगाजी गाविसका कृषक देवेन्द्र सायरले भने, ‘हामीसँग पछि सम्मका लागि भण्डारण गर्ने साधन पनि छैन । गाउँभरि स्याउ फालाफाल छ ।’ केही झरेर बारीमै कुहिने र केही बाँदर र चराले खाएर नष्ट गर्ने उनले बताए । बगाडाका ७० भन्दा बढी किसानले स्याउको व्यावसायिक खेती गरेका छन् ।
बारीमा मात्र २० क्विन्टलभन्दा बढी स्याउ फलेको र आधाजसो कुहिएर र जंगली जनावरले नष्ट गरेर सकिएको सायरले बताए ।
घण्टौं बोकेर बजारमा पुर्याए पनि स्थानीय स्याउ बिक्री हुन गाह्रो हुने गरेको दंगाजीका अर्का कृषक रामबहादुर खड्काले बताए । ‘दिनभर बोकाएर बजारसम्म पुर्याए पनि बाहिरका स्याउको जति मूल्य स्थानीयको पाइन्न,’ खड्काले भने, ‘हाम्रो स्याउ बिक्री हुनै गाह्रो छ । भइहाले पनि भरिया ज्याला पनि उठ्दैन ।’ जिल्ला बाहिरका स्याउको प्रतिकिलो २ सय ५० देखि ३ सय भए पनि स्थानीयको मुस्किलले ५० रुपैयाँमा बिक्री हुने खड्काले सुनाए ।
थोक बिक्रेताले स्थानीय स्याउ खरिद नगर्ने भएकाले पनि आफूहरूलाई समस्या भएको बगाडाकै अर्का किसान मनमती खड्काले बताइन् । ‘थोक विक्रेताले बाहिरैबाट ल्याउँछन्,’ उनले भनिन्, ‘हामीले बाटोमा राखेर सस्तोमा बेच्नुपर्छ ।’ आम्दानीको आशामा १० वर्ष अगाडिदेखि स्याउ खेतीमा लागे पनि बजार नपाउँदा निराश भएको उनले बताइन् ।
जिल्ला कृषि विकास कार्यालयको तथ्यांकअनुसार बझाङमा जम्मा ३ सय ४० हेक्टर क्षेत्रफलमा स्याउ खेती गरिएको छ । जसमध्ये १ सय ७० हेक्टरको स्याउ खेतीले वार्षिक २ हजार टन उत्पादन दिन थालेको वागबानी विकास अधिकृत डोलराज पाण्डेले बताए । आगामी वर्षदेखि अन्य ठाउँमा लगाएको स्याउ पनि फल्न थाल्ने र उत्पादनको परिमाण अझ बढ्ने देखिएको छ । बझाङको स्याउ अमिलो हुने भएकाले बजारमा प्रतिस्पर्धा गर्न नसकेको वरिष्ठ कृषि विकास अधिकृत ईश्वरी पाण्डेको भनाइ छ ।
मीठो स्याउ फल्ने क्षेत्र अत्यन्त दुर्गममा रहेको र बजारको मूल्यभन्दा ढुवानी भाडा नै बढी पर्ने भएकाले बिक्रीको समस्या हुने गरेको उनले बताए । कुनै किसानले आफूसँग भएको स्याउको परिमाणसहित निवेदन दिएमा बजारका लागि पहल गर्ने पाण्डेले बताए ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon