 |
भाद्र ३, २०७३- रियो ओलम्पिक २०१६ को पुरूष फुटबल फाइनल आयोजक ब्राजिल र जर्मनीबीच हुनेछ । शनिबार हुने फाइनलका पाँच महत्वपूर्ण तथ्य एएफपीले तयार पारेको छ :–
१. बदला र पुनर्जागरण
दुई वर्ष अगाडि मात्र ब्राजिलले आफ्नो फुटबल इतिहासमै सबैभन्दा खराब नतिजा बेहोरेको थियो, विश्वकप सेमिफाइनलमा जर्मनीको हातबाट ७–१ को हार । बेलो होरिजेन्टोमा भएको त्यस खेलपछि तिनै दुई टिम ब्राजिलकै भूमिमा भिड्दै छन् । र, यो अवसर जुटाएको छ, रियो ओलम्पिक २०१६ ले । ब्राजिलले बेहोरेको त्यस अगाडि सबैभन्दा पीडादायी हार उरुग्वेविरुद्ध सन् १९५० को विश्वकपमा थियो, जतिबेला कीर्तिमान १ सय ७३ हजारभन्दा बढी दर्शक अगाडि ब्राजिल २–१ ले पराजित भएको थियो, त्यो पनि रियोकै माराकानामा । फाइनल हुने त्यस मैदानसँग भने जर्मनीको खुसी जोडिएको छ । यही मैदानमा उसले दुई वर्ष अगाडि लियोनल मेसीको अर्जेन्टिनालाई हराएर विश्वकप जितेको थियो ।
२. पहिलो स्वर्ण
ब्राजिलले पाँचपल्ट विश्वकप जितेको छ, तर एकैपल्ट पनि ओलम्पिकको पुरुष फुटबलमा स्वर्ण जित्न सकेको छैन । चार वर्ष अगाडि ब्राजिल त्यसको नजिक भने पुगेको थियो, तर फाइनलमा मेक्सिकोसँग पराजित रह्यो । ब्राजिलले अहिलेसम्म दुई रजत र दुई कांस्य जितेको छ । एकीकृत जर्मनीले पनि अहिलेसम्म स्वर्ण जितेको छैन । सन् १९७६ मा पूर्वी जर्मनीले स्वर्ण जितेको थियो । पश्चिम जर्मनीको अहिलेसम्मकै सबैभन्दा राम्रो प्रदर्शन सन् १९८८ मा कांस्य जित्नु रहेको छ ।
३. पुराना शत्रु, नयाँ अनुहार
दुई वर्ष अगाडि ७–१ ले विजयी जर्मन टिमका कोही पनि खेलाडीले अहिलेको फाइनलमा खेल्ने छैनन् । ब्राजिलका नेयमर र बोर्सिया डर्टमन्डका म्याथिस गिन्टर भने सन् २०१४ को आ–आफ्नो विश्वकप टिमका भने सदस्य थिए । चोटका कारण नेयमरले सेमिफाइनल खेल्न पाएका थिएनन्, उनी कोलम्बियाविरुद्धको खेलमा घाइते भएका थिए । गिन्टर भने सब्स्टिच्युट खेलाडी थिए, उनले मौका नै पाएनन् ।
४. उत्कृष्ट डिफेन्सविरुद्ध उत्कृष्ट आक्रमण
जर्मनीले यसपल्ट लगातार गोल गरिरहेको छ । सेमिफाइनलमा उसले नाइजेरियालाई २–० ले हराएको थियो । अहिलेसम्मका पाँच खेलमा जर्मनीले २२ गोल गरेको छ । सेरगे जिनाब्रे र निल्स पिटरसनले सर्वाधिक छ/छ गोल गरेका छन् । ब्राजिलको त्यसको ठीक उल्टो यसपल्टको ओलम्पिकमा अहिलेसम्म कुनै गोल खाएको छैन, भलै, उसले सुरुआती दुई खेलमा आपैंm पनि गोल गर्न सकेन । ब्राजिलले सेमिफाइनलमा होन्डुरसलाई ६–० ले हरायो ।
५. ब्राजिल हेड टु हेडमा अगाडि
सन् २०१४ को त्यो बिर्सन लायक हारका बावजुत पनि ब्राजिल जर्मनीविरुद्ध जित–हारमा अगाडि छ । दुई टिमबीच २२ खेल भएका छन्, त्यसमा ब्राजिलले १२ पल्ट जितेको छ, पाँच खेलमा मात्र पराजित । त्यसमध्ये ब्राजिलको सबैभन्दा खुसीको जित जर्मनीमाथि सन् २००२ को फाइनलमा रहेको छ ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon