 |
काठमाडौँः तेक्वान्दो खेलाडी निशा रावलको स्पर्धासँगै ३१औं ग्रीष्मकालीन रियो ओलम्पिकमा नेपालको यात्रा सकिएको छ । नेपाली तेक्वान्दो खेलाडी निशा रावलले शनिबार ६७ केजी तौल समूहमा प्रतिस्पर्धा गरेकी थिइन् । उक्त स्पर्धामा निशा चिनियाँ खेलाडी झेङ सुइनसँग २-० अंकले पराजित भइन् । पहिलो राउन्डबाटै बाहिरिए पनि निशाको यो सन्तोषजनक प्रदर्शन हो । निशा वाइल्ड कार्डमार्फत् ओलम्पिकमा छनोट भएकी हुन् ।
रियो ओलम्पिकमा नेपालबाट पाँच खेलमा सात खेलाडीले भाग लिएका थिए । यसअघि एथलेटिक्समा हरिकुमार रिमालसहित नेपालका पौडीबाज शिरीष गुरुङ र गौरिका सिंह, जुडोमा फुपूल्हामु खत्री, आर्चरीमा जितबहादुर मोक्तान र एथलेटिक्समा सरस्वती भट्टराईले प्रतिस्पर्धा गरेका थिए ।
रियो ओलम्पिकमा सहभागी खेलाडीमध्ये हरिले पाँच हजार मिटर दौडमा प्रतिस्पर्धा गरेका थिए । उनी ५१ जना सहभागी खेलाडीमा ४६औं भए । यसैगरी रियो ओलम्पिकमा सहभागी ११ हजार खेलाडीमध्ये कान्छी खेलाडी बनेकी १३ वर्षीया गौरिका सिंह पनि हिट चरणबाट नै बाहिरिएकी थिइन् । महिला जुडोको ६३ केजीमा सहभागी जुडो खेलाडी फुपूल्हामु पूरा समय रिङमा टिक्दै बाहिरिएकी थिइन् । पौडीका शिरीषले पनि एक सय मिटर फ्रिस्टाइलमा प्रतिस्पर्धा गरेका थिए ।
एथलेटिक्स महिला १५ सय मिटर दौडमा सहभागी सरस्वतीले पनि नयाँ कीर्तिमान बनाउँदै रियो यात्रा सकेकी छन् । १५ सय मिटरको दौडको हिट चरणमा सरस्वतीले निर्धारित दूरी चार मिनेट ३३.९४ सेकेन्डमा पूरा गर्दै २६ वर्ष पुरानो राष्ट्रिय कीर्तिमान तोडेकी हुन् ।
नेपाललाई उपलब्ध अनिवार्य कोटामार्फत प्रतियोगितामा सहभागी सरस्वतीले यसअघि सन् १९९० को एसियन गेम्समा राजकुमारी पाण्डेले बनेको कीर्तिमान तोडेकी हुन् । राजकुमारीले निर्धारित दूरी चार मिनेट ३४.४७ सेकन्डमा पूरा गरी उक्त कीर्तिमान बनाएकी थिइन् ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon