 |
विभिन्न जिल्लाबाट स्ववियु निर्वाचनको परिणाम आउने क्रम जारी छ । प्रायजसो क्याम्पसमा सत्तारुढ नेपाली कांग्रेस र प्रमुख प्रतिपक्षी नेकपा एमालेका भ्रातृ संगठन विजयी भएका छन् । केहीमा अझै विवादका कारण मतगणना सुरु भएको छैन ।
- कान्तिपुर जिल्ला ब्युरो, काठमाडौं
गुल्मीको रेसुंगा बहुमुखी क्याम्पसको स्ववियुमा जित हासिल गरेपछि खुसियाली मनाउँदै अनेरास्ववियुका विद्यार्थी ।
स्ववियु चुनाव
फाल्गुन २०, २०७३- पूर्वका विभिन्न क्याम्पसमा स्ववियु नेतृत्वका लागि भएको मतदानको परिणामअनुसार बिहीबारसम्म कांग्रेस निकट नेपाल विद्यार्थी संघ र एमालेनिकट अखिल अग्रपंक्तिमा छन् ।
ताप्लेजुङस्थित पाथीभरा बहुमुखी क्याम्पसमा नेविसंघ प्यानल विजयी भएको छ । सभापतिमा प्रेमकुमार राई चुनिए । भोजपुर बहुमुखी क्याम्पसमा एमालेनिकट अनेरास्ववियुले सचिवबाहेक सबै पदमा जित हात पारेको छ । प्रकाशसिं राई अध्यक्ष बनेका छन् । धरानस्थित महेन्द्र बहुमुखी क्याम्पसमा संघीय गठबन्धनले जितेको छ । माओवादी केन्द्र र विप्लव समर्थित विद्यार्थी संगठन, संघीय विद्यार्थी युनियन, समाजवादी विद्यार्थी फोरमको साझा प्यानलका उम्मेदवार समाजवादीका सागरसरगम चेम्जोङ सभापति चुनिए । केन्द्रीय प्रविधि क्याम्पस हातीसारमा सौरभ सञ्जेलको नेतृत्वमा अनेरास्ववियुको प्यानलै विजयी भएको छ ।
संखुवासभाका चारवटै क्याम्पसमा अनेरास्ववियु विजयी भयो । बरुण बहुमुखी क्याम्पसमा सुरेश थापा, मादी बहुमुखीमा नवराज कडुवाल र संखुवासभा बहुमुखी क्याम्पसमा मनोज तामाङ सभापति भए । रामेश्वर बहुमुखी क्याम्पसमा नवीन राईलाई चिट्ठा तानेर सभापति छानियो ।
झापाका ६ मा नेविसंघ
जिल्लाका ६ वटा क्याम्पसमा नेविसंघ विजयी भएको छ । निर्वाचन गरिएका १० मध्ये मेची बहुमुखी क्याम्पसमा विवादले मतगणना सुरु हुन सकेको छैन । नेविसंघले काँकडभिट्टा, दुर्गा, गौरीगन्ज, कन्काई बिर्तामोड, दमक र शनिश्चरेमा जित हासिल गरेको हो । शनिश्चरेमा ईशान पौडेल, दमक बहुमुखीमा विनोद चापागार्इं, बिर्तामोडस्थित कन्काई आदर्शमा सञ्जय राई, गौरीगन्जमा देवकुमार ताजपुरिया, काँकडभिट्टामा सुरज सुवेदी र गरामनीस्थित दुर्गा क्याम्पसमा विनोद उप्रेती सभापति चुनिए ।
गौरादह बहुमुखी क्याम्पस र त्रिदेव क्याम्पस चारआलीमा भने अनेरास्ववियु विजयी भएको छ । गौरादहमा कमल पौडेल र त्रिदेवमा लक्ष्मीप्रसाद न्यौपाने सभापतिमा निर्वाचित भए । देवी क्याम्पस बिर्तामोडको सभापतिमा अखिल क्रान्तिकारीका पदमप्रसाद खड्काले जित हात पारेका छन् । मेची बहुमुखी क्याम्पस भद्रपुरमा भने फर्जी मतको विवादका कारण बिहीबार साँझसम्म पनि गणना सुरु हुन सकेको छैन । धुलाबारी बहुमुखी क्याम्पसमा फागुन २१ गतेका लागि निर्वाचन तय गरिएको छ भने कन्काई बहुमुखी क्याम्पस सुरुंगामा अर्को सूचना नभएसम्मका लागि स्थगित गरिएको छ । मोरङको उर्लाबारी बहुमुखी क्याम्पसमा गणेश घिमिरे नेतृत्वको अनेरास्ववियु प्यानल विजयी भएको छ । पथरी बहुमुखी क्याम्पसमा गोपाल सावाँ नेतृत्वको नेविसंघ प्यानलले जितेको छ ।
कोहलपुरमा अखिलको प्यानलै
बाँकेको कोहलपुरस्थित बागेश्वरी बहुमुखी पब्लिक क्याम्पसमा अनेरास्ववियुका दिनेश केसीको प्यानलै विजयी भएको छ । बुधबार राति अबेर भएको मतगणनामा उनले १ सय ७६ मत ल्याएका हुन् ।
नारायण र द्रोणाचलमा अखिल
दैलेखका नारायण र द्रोणाचल क्याम्पसमा अनेरास्ववियुले जित हासिल गरेको छ । नारायण क्याम्पसमा रेखा थापा र द्रोणाचल क्याम्पसमा अग्नि रिजाल सभापति चुनिए । जिल्लाका पाँचमध्ये चामुन्डा र तिलेपाटा क्याम्पसमा निर्वाचन हुन सकेको छैन । अवलपराजुलमा नेविसंघको प्यानल निर्विरोध भएको छ ।
तीनमा नेविसंघ, एकमा अखिल
पोखराका चुनाव भएका पाँच क्याम्पसमध्ये तीनमा नेविसंघ र एउटामा अनेरास्ववियुले जितेको छ । बिन्दुवासिनी संस्कृत विद्यापीठ, चिकित्साशास्त्र अध्ययन संस्थानको नर्सिङ कलेज र जनप्रिय बहुमुखी क्याम्पसमा नेविसंघ र वन विज्ञान अध्ययन संस्थानको पोखरा क्याम्पसमा अनेरास्ववियुले जित हात पारेका हुन् । इन्जिनियरिङ अध्ययन संस्थानको पश्चिमाञ्चल क्याम्पसमा भने डेढ सय मत गन्न बाँकी छँदा विवाद उत्पन्न भएपछि गणना रोकिएको छ । नेविसंघ र अखिल क्रान्तिकारीले विवाद झिकेपछि मतगणना रोकिएको निर्वाचन समितिले जनाएको छ । बिन्दुवासिनी संस्कृत विद्यापीठमा प्रत्यक्षतर्फ केशव आचार्यको नेतृत्व र नर्सिङ कलेजमा राजलक्ष्मी बस्नेतको नेतृत्वमा नेविसंघ प्यानलै विजयी भएको छ ।
जनप्रिय बहुमुखी क्याम्पसमा नेविसंघ र नयाँशक्ति विद्यार्थीको संयुक्त प्यानलबाट सभापतिमा आशिक गुरुङ विजयी भएका छन् । वन विज्ञान क्याम्पसमा अनेरास्ववियुले प्यानलै जितेको छ । सभापतिमा विशाल अर्याल चुनिए ।
तनहुँमा नेविसंघ
निर्धारित मितिमा नेविसंघले मात्रै उम्मेदवारी दर्ता गरेपछि सहिद कृष्ण क्याम्पसमा निर्विरोध निर्वाचित भएको छ । अन्य चार क्याम्पसमा पनि नेविसंघको प्यानलै विजयी भएको छ । सहिद कृष्ण क्याम्पसमा शीर्षक भट्टराई, आँबुखैरेनी बहुमुखी क्याम्पसमा पूर्णिमा थापा, दमौलीको आदिकवि भानुभक्त क्याम्पसमा दुर्गा भण्डारी, भिमादको जनज्योती क्याम्पसमा सुनिल श्रेष्ठ सभापति भएका छन् । त्यस्तै गोरखाको लक्ष्मीबजारस्थित द्रव्यशाह बहुमुखी क्याम्पसमा एक सदस्यबाहेक सबै पदमा नेविसंघले विजय हासिल गरेको छ । ८७ मत ल्याएर प्रविन बस्नेत सभापति चुनिए ।
रेसुंगामा संयुक्त प्यानल
गुल्मीको रेसुंगा क्याम्पसमा श्रीराम महतको नेतृत्वमा अनेरास्ववियु र क्रान्तिकारीको संयुक्त प्यानल विजयी भएको छ । महतले ३ सय ६१ र उनको प्रत्यासी नेविसंघका तोमलाल पन्थीले ३ सय १ मत ल्याए । २०४१ देखि नै यहाँ नेविसंघले जित्दै आएको थियो ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon