 |
चैत्र १६, २०७३- फुङलिङ नगरपालिका ३ का कृष्ण बस्नेतले ल्याएको एउटा गाई अपांगजस्तै भएको छ । १ लाख २५ हजार रुपैयाँमा खरिद गरेको गाई ‘बस्न सक्दैन, बसिहाले उठ्न सक्दैन ।’ गाईलाई अपांग हुनबाट बचाउन उनले बोरा र डोरी लगाएर त्यसैमा अडिएर बस्न र उठ्न सक्ने विधि अपनाएका छन् । गोठमा बाँसको बलोमा डोरी अड्याएर गाईलाई थमाएर राखेका छन् ।
उनको सहयोगमा ल्याइएका १० वटा गाईहरूमा कुनै न कुनै समस्या देखिएको छ । ‘कतिपय कुँजो भएर उठ्नै नसकी मरे । कतिपय फेरि भर्ना हुन सकेनन् । कुनैबाट दुधै आएन,’ उनले भने, ‘ल्याउन होस नपुर्याए लाखौं रुपैयाँ स्वाहा हुने मात्रै नभएर पाल्दा हैरान हुने रहेछ ।’
यहाँ उन्नत जातका गाई इलामबाट ल्याउनुपर्छ । सबै गाई पिकअप (सानो) गाडीमा राखेर ल्याउनुपर्छ । बस्नेतको अनुभवमा गाडीमा बसाएर ल्याए त्यो गाईमा कुनै न कुनै समस्या आइहाल्छ । त्यसैले बस्न नदिई उभ्याएर डोरीले बाधेर ल्याउनुपर्छ । बसाएर ल्याए जोड्नीहरू खुस्कने, शरीरको भित्री भाग थर्किएर काम गर्न नसक्ने अवस्थाको हुने उनको अनुभव छ ।
गाडीमा त्यही बलो लगाएर बोराको बस्ने बनाएर अड्याएर ल्याए मात्रै सुरक्षित गन्तव्यमा पुर्याउन सकिने बस्नेत बताउँछन् । जिल्ला पशुसेवा कार्यालयका बरिष्ठ पशु विकास अधिकृत बोधनाथ अधिकारी गाडीमा कसरी गाई ओसार्ने भन्ने विषयमा किसानलाई आफूहरूले परामर्श दिन थालेको बताउँछन् । ब्याउने र ब्याएको गाईमा क्याल्सियमको मात्रा अत्यन्तै कम हुन्छ । हड्डीहरू कमजोर हुन्छन् । दूधको माध्यमबाट शरीरको क्याल्सियम बाहिर निस्कन्छ । त्यसैले तागतिलो खानेकुरामा ध्यान दिनुपर्ने र गाडीमा अड्याएर बिस्तारै हिँडाउनुपर्ने उनले बताए । गोठमा पुर्याइसकेपछि पनि गाईलाई बसिरहन दिन नहुने उनले बताए । बसिरहे त्यसको तल्लो भागमा घाउ हुन्छ र त्यो निको बनाउन कठिन हुन्छ । त्यसैले बस्न दिन नहुने उनको सुझाव छ ।
उन्नत जातको राम्रो गाईलाई सन्तुलित खुराक दिनु आवश्यक भएको उनले बताए । किसानले चाँडो पुर्याउनका लागि दैनिक तीन सय किलोमिटरभन्दा बढी गाडीमा हिँडाउँदा पनि समस्या हुने कार्यालयका प्राविधिकहरू बताउँछन् ।
शिक्षक छाडी गाईपालन
फुङलिङ नगरपालिका ४ का कृष्ण बस्नेत शिक्षण पेसा छोडेर गाईपालनमा लागेका छन् । थुकिम्वा घर भएका उनले फुङलिङ नगरपालिकामा लखनाथ बरालको जग्गा भाडामा लिएर गाईपालन सुरु गरेका हुन् । इलामबाट उन्नत जातका ६ वटा गाई ल्याएर व्यवसाय सुरु गरेका बस्नेत गाई र बाच्छा गरी अहिले १८ वटा पुगेको बताउँछन् । तीन जनालाई रोजगारी दिइरहेका उनले मासिक १ लाख रुपैयाँ आम्दानी लिइरहेका छन् ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon