 |
श्रावण १८, २०७३- मधेसी मोर्चा सहितको संघीय गठबन्धनले समर्थन जनाएपपछि प्रधानमन्त्रीका उम्मेदवार नेकपा-माओवादी (केन्द्र)का अध्यक्ष पुष्पकमल दाहालको पक्षमा करिब ३ सय ६० बढी सांसदको समर्थन पुगेको छ ।
संसद भित्रको ठूलो दल कांग्रेसको साथ पहिलेदेखि पाएका दाहाल बुधबार दोस्रो पटक प्रधानमन्त्री निर्वाचित हुने निश्चित भएको छ । संविधानमा चित्त नबुझाएर विगत एक वर्षदेखि आन्दोलनमा रहेको संयुक्त लोकतान्त्रिक मधेसी मोर्चालेपनि मंगलबार दाहालको पक्षमा जाने निर्णय लिएपछि उनको उम्मेदारी थप बलियो भएको हो ।
कांग्रेस सभापति शेरबहादुर देउवा प्रस्ताव रहेको उनको उम्मेवारीको समर्थनमा मधेसी दलका नेताहरु छन् ।
संसद भित्र तेस्रो दल रहेको माओवादी अध्यक्ष दाहालको पक्षमा स्पष्ट बहुमत देखिएको छ । संसदमा अहिले कायम ५ सय ९५ सांसदमा प्रधानमन्त्री निर्वाचित हुन २९८ मत आवश्यक छ ।
कांग्रेस २ सय ७, माओवादी ८० (सभामुखले मतदान नगर्ने र एक निलम्बित बाहेक), संघीय गठबन्धन ४२ (मधेसी मोर्चा भित्रका ७ दलका ३९ र अन्यको ३) फोरम लोकतान्त्रिक १४, राप्रपा १२ र नेकपा संयुक्त सहित केही अन्य साना दल र २ जना स्वतन्त्र सांसद पनि दाहालको पक्षमा छन् ।
गठबन्धनका नेता रामसपाका महासचिव केशव झाले कांग्रेस-एमाओवादीसँगको तीन बुँदे सहमतिपछि गठबन्धनले दाहालको पक्षमा मतदान गर्ने निर्णय लिएको बताए ।
एमालेले उम्मेदवारी नदिने निर्णय लिएपछि दाहालको एक्लैको उम्मेदवारी रहने सम्भावना छ । यद्यपी उम्मेदवारी दर्ताको समय आज अपरान्ह ४ बजेसम्म छ ।
दाहालको एक्लै उम्मेदवारी कायम रहेपनि संसदमा उनको पक्ष र विपक्षमा मतदान हुनेछ । एमालेले दाहालको विपक्षमा मतदान गर्ने निर्णय लिएको छ ।
हाल सत्तापक्षमा रहेका एमालेको १ सय ८२, राप्रपा(नेपाल) को २५, नेकपा(माले)को ५, नेमकिपाको ४, राष्ट्रिय जनमोर्चाको ३, नेपाल परिवार दलको २, बहुजन शक्ति पार्टीको १ र मधेस समता पार्टीको १ गरी कुल २ सय २३ पक्ष छ ।
सबै दलले कता मतदान गर्ने बारे अझै स्पष्ट निर्णय लिइसकेको छैन । राप्रपा नेपालले आज आफ्नो बैठक बोलाएको छ । पार्टी सहायक प्रवक्ता मोहन श्रेष्ठले दाहालको पक्ष वा विपक्षमा मतदान गर्ने बारे निर्णय लिन कार्यसम्पादन र संसदीय दलको संयुक्त बैठक जारी रहेको बताए ।
संसद नियमावलीले तटस्थ बस्न नपाउने व्यवस्था भएकाले सबै संसदले पक्ष वा विपक्षमा मतदान गर्नुपर्ने छ ।
भोलि(बुधबार) बिहान ११ बजे बस्ने संसद बैठकमा लागि ३९ औं प्रधानमन्त्रीकालागि निर्वाचन हुने संसदले कार्यतालिका तोकेको छ ।
१२ वर्ष सशस्त्र संघर्ष गरेको माओवादीले ०६२ सालमा तात्कालिन राजा ज्ञानेन्द्रको निरंकुश शासन विरुद्ध आन्दोलनरत् ७ दलसँग १२ बुँदे सहमति गरेर शान्ति प्रक्रियामा आएको थियो । ०६३ सालमा आन्दोलनको सफलतापछि शान्ति सम्झौता गरेर माओवादी युद्ध त्यागेर मुलधारको चुनावी राजनीतिमा होमिएपछि ०६४ साल चैत्रमा भएको संविधान निर्वाचनमा पहिलो दल भएर आएको थियो ।
०६५ भदाैमा दाहाल एमाले र मधेसी दलको सहयोगमा प्रधानमन्त्री भएका थिए । प्रधानसेनापति रुक्मागंत कटवाललाई हटाउने विवादित प्रकरणका कारण उनी ९ महिनामै सरकारबाट बाहिरिनु परेको थियो । करिब ९ वर्षको अन्तरालपछि दाहाल पुनः सिंहदरवारको कुर्सीमा बिराजमान हुँदैछन् । यसअवधिमा दोस्रो संविधानसभा निर्वाचनबाट संसदमा पहिलो बाट तेस्रो र पार्टी पटक पटक विभाजनको पीडा दाहालले भोगि सकेका छन् ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon