 |
भाद्र २, २०७३- जनैपूर्णिमाको अवसरमा म्याग्दी जिल्लाको शिखा गाविस-७ खयरबराही ताल छेउमा अवस्थित मन्दीरमा धार्मिक मेला लागेको छ ।
अन्नपूर्ण हिमालको पश्चिम फेदीमा ४ हजार ६ सय ६० मिटर अग्लो स्थानमा रहेको खयरबराही तालमा जनैपूर्णिमा मेला भर्न यस वर्ष करिव तीन हजार भक्तजन पुगेका छन् ।
खयरबराही तालमा पुगेर खसीबोको बली दिने ‘भाकल’ गरेका भक्तजनहरु पुगेका छन् । खयरबराही देवीसँग विदेश जाने, लाहुरे हुने, धन, विद्या, सन्तान प्राप्ति लगायतका मनले इच्छाएको ‘वर’ मागेमा पुरा हुने जनविश्वास छ । यस वर्ष वर पुगेको भन्दै पाँच सय यात्रु बली दिन आएका छन् ।
खयरबराही संरक्षण तथा पूर्वाधार विकास समितिका अनुसार यस वर्ष खयरबराही दर्शन तथा पुजा गर्न करिव तीन हजार भक्तालु आएका छन् । यी मध्य ‘भाकल’ अनुसार पाँच सय भेडाको बली दिन सुरु भएको छ ।
‘मैले अघिल्लो वर्ष अमेरिकाको भिसा मागेको थिएँ । पुग्यो । त्यसैले १५ दिनको छुट्टी लिएर खयरबराही देवीको पुजा गर्न आएको हुँ,’ भक्तजन यामबहादुर पुनले भने, ‘खयरबराहमा इच्छायको वर माग्न वा मागेको/आँटेको काम पुरा भएपछि भाकल अनुसारको पुजा गर्न आउँछन् ।’
अन्नपूर्ण संरक्षण क्षेत्र आयोजना (एक्याप) अन्तर्गत पर्ने खयरबराही ताल सवै भन्दा नजिकको वस्ती पाउद्धारबाट तीन दिन लाग्छ । बाटोमा खाना र बस्नकोलागी गोठहरु पाइन्छन् । यात्रुहरुले आफ्नो ओढ्ने/ओछ्याउने भने आफैं व्यवस्था गर्नु पर्छ । सुविधाका लागि टेन्ट बोक्नु राम्रो हुन्छ ।
खयरबराही ताल पुग्न सदरमुकामबाट दुई घन्टा बसमा पोखरेबगर पुगेपछि चार घन्टा उकालो हिँडेर सबैभन्दा नजिकको बस्ती पाउद्वारमा बास बस्न पुग्न सकिन्छ । पाउद्धारदेखी कम्तीमा ६ घन्टा उकालो उक्लेपछि तीन हजार छ सय मिटर अग्लो खोप्रालोकमा बास बस्न सकिन्छ । होटलमा बस्न नसक्ने वा स्वयंपाक्य यात्रुको सुविधाका लागि नि:शुल्क प्लास्टिक घर वा गोठ छन् ।
तेस्रो दिन चार घन्टा उक्लेर नौलोवन वा खयरखोलामा बास बस्नु पर्छ । यहाँ भने समुदायले निर्माण गरेको प्लास्टिक घर वा भेडी गोठमा रात बिताउनु पर्छ ।
चौथो दिन राति तीनबजेदेखी यात्रा गरी बिहान ६ बजे खयरबराही ताल पुग्न सकिन्छ । पुजासकेपछि ओरालो बाटो भएकोले खोप्रा वा पाउद्धारमा नै ओर्लन सकिन्छ ।
खयरबराही ताल तथा मन्दिर पुग्न सबैभन्दा नजिकको बस्ती पाउँद्धारबाट तीन दिन हिमाली उच्च भूगोलमा पुग्नु पर्ने भएकोले लेक लाग्ने तथा हिँडाई कठिन हुन्छ । पछिल्लो वर्ष खयरबराही मन्दिर प्रबर्द्धन तथा संरक्षण र प्रचारप्रसारमा बेलायतमा बस्ने राजु पुन सक्रिय छन् ।
खयरबराह संरक्षण समितिले अप्ठ्यारो स्थानमा सिंढीसहितको पदमार्ग बनाउने, खोप्रा, नौलोवन तथा खयरखोलामा भक्तालुहरु बस्नकालागी पक्की प्लास्टिक बस्ने टनेल र बीचबीचमा चिया, खाजा तथा पानीको व्यवस्था गरेको छ ।
‘हिमालमुनीको तिर्थस्थलमा हत्तपत्त जो कोही पुग्न सजिलो छैन । लेक लाग्ने, विष लाग्ने र हिँड्न गाह्रो छ । त्यसैले बास बस्न प्लास्टिक टनेल, भोजन तथा औषधी उपचार ब्यवस्था गरेका छौं,' अभियन्ता राजु पुनले भने, ‘मन्दिर पुग्ने अप्ठ्यारो बाटो खयरबराही देवी आर्सिवाद पाएका भक्तालुहरुले निर्माण गरेका छन् ।
खयरबराह ताल धार्मिक महत्वको मात्र होइन पर्यटकीय दृष्टिकोणले पनि महत्वपूर्ण छ । रंगीविरंगी फूलहरुको गलैंचामा टेक्दै खोप्रादेखी खयरबराही ताल पुग्दा गोर्सेबराही ताल, कालीबराही ताल, कामधेनु गाईको पाईला (फाल)को दर्शन गर्न सकिन्छ ।
विभिन्न प्रजातिका रंगीन फूलहरुको बगैंचामा हिंड्दा ‘भू-स्वर्ग’ पुगेको अनुभुत हुन्छ । धौलागिरी हिमश्रृंखला र अन्नपूर्ण प्रथम, साउथ तथा बराहशिखर हिमाललाई झन नजिकैबाट अवलोकन गर्दा यात्रुलाई यात्राको थकान बिर्साउँछ । यहाँबाट सूर्यास्तको दृष्यबढी मनमोहक हुन्छ ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon