 |
भाद्र १४, २०७३- युवापुस्ताका चर्चित नायक अनमोल केसी डुकाटी बाइक हाँक्छन् । उनी कारभन्दा बाइक नै चढ्न बढी रुचाउँछन् । ‘कार किन्न भनेको हुँ । तर मानेन, डुकाटी किन्यो,’ भुवन केसीले छोराले पहिलेदेखि नै बाइक चढ्न मन गर्ने गरेको सुनाउँदै भने । त्यसो त भुवन कारका सौखिन हुन् । ‘गाडी सिकेकै ४० वर्ष भइसक्यो,’ अभिनेता भुवनले कान्तिपुरसँग सवारी अनुभव सुनाउने क्रममा भने, ‘सुरुमा टोयोटा कोरोला चढें । ३७ वर्षदेखि गाडी चढ्दै आएको छु ।’ भुवनले छ महिनाअघि मात्रै किया स्पोर्टेज छाडेर क्रेटा चलाउन थालेका रहेछन् । यतिबेला भने उनको मन कारमा भन्दा जिपतर्फ तानिएको रहेछ । ‘काठमाडौं जस्तो ठाउँमा कारभन्दा जिप नै राम्रो देखियो । क्रेटा जिप सुटिङमा उकालो, ओरालो जानुपर्ने भएकाले ठीक छ । फोर ह्वील पनि भएकाले खाल्डाखुल्डीमा पनि सजिलै कुद्छ,’ भुवनले आफ्नो सवारीप्रति सन्तुष्टि देखाए ।
नायिका प्रियंका कार्कीले हुन्डाईको टक्सन चढ्न थालेको निकै भइसक्यो । त्यसअघि उनी टीभीएसको विगो स्कुटी कुदाउँथिन् । त्यसो त स्कुटीबाट एकैचोटि टक्सनमा जम्प हुँदा प्रियंकाको राम्रै चर्चा पनि भएको थियो । त्यसबखत उनले ‘आफ्नै मिहिनेतको कमाइले किनेको’ अभिव्यक्ति नै दिनुपर्यो । तर उनी अमेरिका बस्दा नियमित कारमा हुइँकिने गर्थिन् । ‘म पहिलेदेखि नै गाडी चढ्दै आएकी छु । नेपाल आएपछि धेरै समय स्कुटी चलाएँ । यहाँ गाडी किन्न पनि महँगो छ । चलाएर हिंड्न झन् गाह्रो छ,’ प्रियंकाले थपिन्, ‘फेरि हाम्रो जस्तो पेसामा आफ्नै गाडी नभई पनि नहुने । सधैं ट्याक्सी वा स्कुटीमा हिंड्न पनि सहज हुँदैन । अहिले त गाडी सौख मात्रै नभएर आवश्यकता नै भइसक्यो ।’ टक्सन ठूलो हुने भएकाले प्रियंकालाई यसमा धेरै सामान लिएर हिंड्न सहज भएको रहेछ । ‘टक्सनमा स्पेस ठूलो छ र क्लिअरेन्स पनि राम्रो छ । कति अप्ठ्यारा ठाउँमा लिएर जानुपर्ने हुन्छ, त्यसका लागि सजिलो भएको छ ।’ तर टक्सन ठूलै भएका कारण साँघुरा ठाउँमा लैजान गाह्रो हुने, डिजेल धेरै चाहिने र पार्ट्स महँगो हुने बेफाइदा पनि भोगेकी रहिछन् प्रियंकाले ।
नायिका हुनुअघि नै रेखा थापा हकी स्वभावकी थिइन् । १४ वर्षको छँदै गाडी चलाउन जानिसकेकी थिइन् । उनले गाडी चलाएरै हिंड्न थालेको पनि १३ वर्ष भएछ । ‘पहिलो सवारी अल्टो थियो’ रेखाले यतिबेला भने पाँचौं गाडीका रूपमा एक महिनादेखि भक्सवागन जिप चलाउँदै आएकी छन् । त्यसअघि उनको सवारी टेरिस कार थियो । भक्सवागन जिप चलाउँदाका राम्रा पक्षबारे रेखाले भनिन्, ‘पहिले त यसको ब्रान्ड नै राम्रो भयो । फेरि मलाई पहिलेदेखि नै यसको जिप चढ्न रहर थियो । चलाउन कम्फर्ट छ ।’ त्यसो त रेखालाई गाडी फेर्ने बानी नै लाग्न थालेको बताइन् । तर, अहिलेको जिप तत्काल फेरिहाल्ने पक्षमा भने छैनन् रे ।
नायक जीवन लुइँटेलले कार हुइँक्याउन थालेको पाँच वर्ष भएछ । स्यान्ट्रोबाट निजी सवारी चलाउन थालेका जीवन यतिबेला भने मलेसियन कम्पनीको पेरोडोआ हाँक्छन् । ‘एक वर्ष भयो पेरोडोआ चलाउन थालेको । एकदमै इकोनोमी र धेरै माइलेज दिने भएकाले मलेसियामा यो चल्तीको कारमा पर्छ,’ जीवनले अनुभव सुनाए, ‘अनि आकार पनि सानो भएकाले चलाउन सजिलो छ ।’ जीवनले त्यसअघि भने इटालीको डेओ र फियट चलाइसकेका छन् । ‘निजी सवारीमा हिंड्नु सेलिब्रिटीका लागि आवश्यकता नै भइसक्यो,’ उनले भने । समाजले सेलिब्रिटीलाई हेर्ने दृष्टिकोण र सुटिङका लागि कुदिरहनुपर्ने बाध्यताले गर्दा पनि आफ्नै सवारी हुनु जरुरी रहेको जीवन जिकिर गर्छन् ।
रेखा देखासिकीले गाडी चढ्नु विकृति निम्त्याउनु ठान्छिन् । बाध्यताले नै सेलिब्रिटीले कार चढ्नु पनि बेकार मान्छिन् उनी । भन्छिन्, ‘देखासिकीले गर्दा वा सान देखाउन कसैले चढ्छ भने त्यसले विकृति निम्त्याउँछ । सवारी भनेको सौख र क्षमता भएर चढ्ने हो ।’ भविष्यमा भने उनलाई ल्यान्डरोभरको गाडी हाँक्ने सौख रहेछ । प्रियंकालाई भने सानो भएकैले यतिखेर महिन्द्राको केयूबीले मन जितेको सुनाइन् ।
अभिनेता भुवन पनि सेलिब्रिटीका लागि आफ्नै सवारी हुनु जरुरी रहेको बताउँछन् । ‘विदेशमा त सवारी भनेको खुट्टा जस्तै हो । हामीकहाँ पनि यो सौख मात्रै नभई अति आवश्यक भइसक्यो । कस्तो क्वालिटीको चढ्ने भन्ने आफ्नो ठाउँमा होला तर सेलिब्रिटीले त चढ्नै पर्ने भइसक्यो,’ उनले भने । त्यसो त बाटोको अवस्थाले पनि गाडी चलाएर हिंड्नु सहज नभएको टिप्पणी गर्दै उनले सुनाए, ‘पहिले म सिनामंगलबाट पाँच मिनेटमा न्युरोड पुग्थें । अहिले बिहान हिंड्यो भने कुन बेला पुगिन्छ भन्ने पनि थाहा हुँदैन ।’ भुवनलाई भने भविष्यमा फरारी चलाउने ठूलो सौख रहेछ । त्यसबाहेक अरू कार/जिप उनका लागि माइनर भइसके रे । जीवन भने पेरोडोआ चेन्ज गर्ने मुडमा रहेनछन् । उनको ड्रिम कार भने जर्मनीको अडी रहेछ ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon