 |
भाद्र १३, २०७३- साउदी अरबमा तेस्रो मुलुक हुँदै पुर्याइएका घरेलु कामदार (हाउसमेड) को समस्या फेरि बढ्न थालेको छ । साउदीस्थित नेपाली दूतावासका अनुसार न्यूनीकरणतर्फ उन्मुख भइरहेको अवस्थामा विगतझैं फेरि समस्या तथा आपतविपतमा परेर हाउसमेडहरू आउने क्रम बढेको छ । ‘हाम्रो सेल्टर रित्तिइसकेको थियो । कहिलेकाहीँमात्रै आउने अवस्था बनेको थियो,’ साउदीका लागि कार्यवाहक राजदूत आनन्दप्रसाद शर्माले भने, ‘बिचल्लीमा परी भागेर आउने हाउसमेडको समस्या पहिलाजस्तै बढेको छ ।’
अहिले दूतावासको रेखदेखमा २४ पीडित महिला छन्, जसमध्ये दूतावासकै सेल्टरमा ११ जना तथा साउदी सरकारको घरेलु कामदार विभागको सेल्टरमा १३ जना छन् । ‘उनीहरूलाई स्वदेश पठाउने प्रक्रिया सुरु भएको छ । आवश्यक प्रक्रिया पूरा गरेपछि मात्रै फिर्न सक्छन्,’ उनले भने ।
सरकारले खाडीमा हाउसमेड पठाउने समयमा समेत रियादस्थित नेपाली दूतावासले स्थानीय स्पोन्सरलाई अनुमति दिएको थिएन । कुबेत, यूएई र ओमनमा साउदी नागरीक आफैं पुगेर हाउसमेड लिएर जान्थे । त्यतिखेर दूतावासले साउदी र कुवेतका उच्च सरकारी तहमा साउदी नागरिकले आउँदा ल्याएको हाउसमेड जाँदा पनि साथमै हुनुपर्ने भन्दै बारम्बार ध्यानकर्षण जनाएका थिए । दूतावासको ध्यानाकर्षणपछि साउदी र कुवेतका अध्यागमनले पनि कडाइ गरेको थियो ।
पछिल्लो समयमा हाउसमेड अभाव भएपछि दुवै देशले कडाइ गर्न छाडेका छन् । नेपाललाई बारम्बार हाउसमेडमाथि लगाएका प्रतिबन्ध हटाउन र श्रम सम्झौता गर्न साउदीले अग्रसरता देखाउँदै आए पनि नेपाली पक्षबाट आवश्यक काम भएको छैन । ‘सेल्टरमा जति महिला आएका छन् । उनीहरू सबै कुवेत र यूएईमा काम गर्न आएकाहरू छन्,’ उनले भने, ‘साउदीकै लागि आएकाहरू एकदमै कम छ ।’
हाउसमेड पाउन छाडेपछि स्पोन्सरहरूले काम गरिरहेकालाई पनि स्वदेश पठाउन रोक लगाएको छ । चार वर्षसम्म घर नपठाएपछि भागेर दूतावासमा आइपुगेकी सिन्धुपाल्चोककी रूपरानी तामाङले दिएको बयानमा उल्लेख छ, ‘बीचमै आउँछ भनेर होला, चार वर्षसम्म काम गर्दा पनि तलब दिएन ।’ दूतावासले रूपरानी र बाँकेकी पूजा सुनारलाई उद्धार गरी स्वदेश पठाएको छ ।
साउदीमा तेस्रो मुलुकबाट घरेलु कामदार ल्याउने प्रक्रिया झन् बढेको उनले बताए । कञ्चनपुरकी आयशा कार्कीले आफूलाई भारत–चीन–श्रीलंका हुँदै साउदी ल्याइएको बताइन् । ‘यूएईको होटलमा काम गर्न भनेर हिँडेको थिएँ । दलालले झुक्काएर साउदी ल्याइदिए,’ तीन महिनादेखि सेल्टरमा बस्दै आएकी कार्कीले भनिन् । दूतावासले सेल्टरमा रहेका महिलाका लागि टिकट जुटाउने काम भइरहेको जनाएको छ । कार्कीलाई ‘रामचन्द्र उद्धार समिति’ साउदीले टिकट दिएको छ ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon