Lamjung Dhudhpokhari bathe in the crowd

भाद्र २, २०७३- यहाँको उच्च स्थानमा रहेको दूधपोखरीसहितका तालतलैया तथा धार्मिक स्थलमा नुहाउनेको भीड लागेको छ । जनै पूर्णिकाको अवसर पारेर बिहीबार बिहानैदेखि नुहाउनेको भीड लागेको हो ।

जनैपूर्णिमाको दिन लमजुङ, कास्की र मनाङको सिमानामा पर्ने ताल दूधपोखरीमा नुहाउनेको भीड बढेको स्थानीयले बताएका छन् । दूधपोखरी समुद्री सतहदेखि ५ हजार ३ सय मिटर उचाइमा रहेको छ । घनपोखराका जीतबहादुर गुरुङका अनुसार दूधपोखरीमा नुहाउन जानेहरु बुधबार साँझ थुर्जुमा बास बसे । उनीहरुले बिहीबार बिहान नुहाएका छन् । ‘नुहाउनुअघि धुप बालेर पूजापाठ गरिन्छ । अनिमात्रै नुहाइन्छ,’ उनले भने, ‘नुहाउँदा साबुन प्रयोग गर्न पाइँदैन ।’ जिल्लाको ग्रामीण क्षेत्रबाट २ दिनमा पुगिने उक्त ठाउँ जान सदरमुकाम बेसीसहरबाट ३ दिन लाग्छ ।

थुर्जुबाट करीब ३ घण्टाको बाटो हिँडेर भक्तजनले बिहीबार बिहान नुहाएका हुन् । ‘जनैपूर्णिको दिन दूधपोखरी र थुर्जुमा मेला नै लाग्छ,’ गुरुङले भने । दूधपोखरी पुगेमा लेक लाग्ने र बस्ने ठाउँ पनि नभएकाले नुहाउन जानेहरु भेडीगोठमा बास बस्छन् । दूधपोखरी नुहाउन यसपटक भुजुङ, पसगाउँ, घनपोखरा, सिउरुङ, ताघ्रिङ लगायत ठाउँका भक्तजन गएका सिउरुङका पूर्णसिंह गुरुङले बताए । उनका अनुसार सिउरुङबाट युवायुवतीको समूह नै दूधपोखरी पुगेर नुहाएका छन् । पर्यटन ब्यवस्थापन उपसमिति सिउरुङका सचिव उमरबहादुर गुरुङका अनुसार गाउँको म्युजिक भिडियो छायांकनको लागि समेत टोली दूधपोखरी पुगेका छन् ।

स्थानीयका अनुसार दूधपोखरीमा नुहाउनका लागि लमजुङका मात्रै नभएर कास्कीको ताङतिङ र सिक्लेसका स्थानीय समेत भीड लागेको छ । मनाङबाट पनि दूधपोखरी नुहाउन भक्तालु पुगेका छन् । दूधपोखरी ताल पन्ध्रौँ सातब्दीमा द्रब्य शाहकी दुई रानी मध्ये यम्फावतीको लेकाली कन्दरामा मरणको कथासँग जोडिएको छ । रानीको मृत्यूपछि द्रब्य शाहले बौक्दै ल्याउने क्रममा रानीको स्तन दूधपोखरीमा खसेकोले त्यस स्थानको नाम दूधपोखरी रहन गएको किंवदन्ती रहेको भेटीगोठाला कर्तसिंह गुरुङ बताउँछन् । दूधपोखरीमा नुहाएमा मनकामना पुरा हुने विश्वास रहेको उनको भनाइ छ ।

लमजुङ र गोरखाको सिमानामा रहेको चेपे नदीको सिरान पनि अर्के दूधपोखरी रहेको छ । करीब ४ हजार ८ सय मीटरको उचाइमा रहेको उक्त दूधपोखरी च्यवन ऋषिको कथासँग जोडिएको छ । दूधपोखरीमा नुहाएपछि च्यवन ऋषिले पुनर्यौवन पाएको र फुटेको आँखा निको भएको शास्त्र, पुराण तथा आयुर्वेद ग्रन्थहरुमा उल्लेख रहेको सर्वोदय सेवाश्रमका अध्यक्ष कृष्णराज ओलियाले बताए ।

यस्तै, भुलभुले र बन्सारको सिमानामा रहेको बराहपोखरीमा पनि नुहाउनेको भीड लागेको छ । बरापोखरीमा जनैपूर्णमा र बैशाख पूर्णिमा गरी बर्षको २ पटक नुहाउने मेला लाग्छ । करीब ३ हजार ६ सय ५० मीटर उचाइमा रहेको बराहपोखरी भगवान विष्णुको वासास्थान तथा थकाई मेटेको कथासंग जोडिएको हिलेटक्सारको टक्सार गाउँका जसबहादुर गुरुङले बताए । ‘यो ठाउँ पुग्न एक दिन लाग्छ,’ उनले भने, ‘नजिकै भएकाले पनि बराहपोखरी नुहाउन गोरखा, धादिङ, चितवन, पोखरा, काठमाडौं देखिका भक्तजन आउँछन् ।’

बर्षेनी जिल्लाको तीनवटै ठाउँमा नुहाउनेको भीड लाग्ने गर्छ । तर, यी ठाउँको संरक्षण र संबर्द्धन हुन नसकेको नुहाएर फर्कनेहरु बताउँछन् । जनैपूर्णिको दिन यी पोखरीमा नुहाए बर्षौंदेखिको रोगब्याधी निको हुने, मुख नबोल्नेहरु बोल्ने, मनोकामना पुरा हुने विश्वास रही आएको छ ।

• Tweet
• Share
• Share
• Share
• Share

About Admin MC3

This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.

Related Post