 |
श्रावण २६, २०७३- एक साताअघिदेखि सदरमुकाममा विद्युत सेवा बन्द भएपछि मोबाइल चार्ज गर्न समेत ३० रुपैयाँ तिर्नुपर्ने अवस्था आएको छ ।
सदरमुकाम मार्तडीमा केही पसलका सञ्चालकहरुले जेनेरेटर चलाएर मोबाइल चार्ज गराउन थालेका हुन् । उनीहरुले एउटा मोबाइल चार्ज गरेको न्यूनतम ३० रुपैयाँ लिने गरेको स्थानीय पुष्प कटुवालले बताए । ‘चार्ज गर्ने वैकल्पिक उपाय नभएकाले पसलेहरुले तोके अनुसारको रकम तिर्नुपर्ने बाध्यता भएको छ,’ पुष्पले भने ।
महालक्ष्मी मोबाइल ग्यालरी, ज्ञानु फोटो स्टुडियो, साझा डिजिटल फोटो स्टुडियो लगायत पसलका सञ्चालकहरुले जेनेरेटर चलाएर मोबाइल चार्ज गराउँदै आएका छन् । उपभोक्ताहरु भने चर्को मूल्य तिर्नु परेपनि मोबाइल चार्ज गर्न पाएकोमा केही सजिलो भएको बताएका छन् । ‘सञ्चारबिहीन हुनुभन्दा पैसा तिरेर चार्ज गर्न पाएकोमा पनि सुविधा नै लाग्यो,’ मार्तडीकै श्यामबहादुर रावलले भने, ‘मोबाइल अफ भएको थियो ।' चार्ज गराउने पसलहरुमा बिहानैदेखि मोबाइल चार्ज गर्नेहरुको घुइँचो लाग्ने गरेको छ ।
सिमित पसलमा मात्र उक्त सुविधा भएकाले सबै उपभोक्ताले मोबाइल चार्ज गर्न पाएका छैनन् । ‘बिहानैदेखि लाइनमा बस्दा पनि पालो पाइएको छैन,' दलबहादुर बिकले भने । ‘बिहानदेखि साँझसम्म सय बढी मोबाइल चार्ज हुने गरेका ज्ञानु फोटो स्टुडियोका सञ्चालक ज्ञानबहादुर रोकायाले बताउँछन् । सदरमुकाममा नेपाल टेलिकम र एनसेलको नेटवर्क छ । मार्तडीको विद्युत सेवा वितरित जुगाडा र बुढीगंगामा गरी २० हजार बढी मोबाइलका ग्राहक रहेको अनुमान छ ।
विद्युत सेवा अवरुद्ध भएपछि मार्तडी, जुगाडा र बुढीगंगा गाविसका दुई हजार बढी परिवार अध्याँरोमा बस्न बाध्य छन् । स्थानीय एफएम, पत्रपत्रिका, टेलिभिजन, मोबाइल, इमेल इन्टरनेट सेवा अवरुद्ध छ । सबै कार्यालयमा विद्युतीय उपकरणद्वारा कामकाज हुने भएकाले विद्युत सेवा अवरुद्ध भएकाले कार्यालयको काम प्रभावित छ । ‘अत्यन्त जरुरी कामहरु गर्नुपरे चौतर्फी भौतारिनुपर्ने अवस्था छ,' सिडिपीका जिल्ला संयोजक खिमु केसीले बताए । जेनेरेटर चलाएर केही पसलेहरुले फोटोकपी सेवा समेत उपलब्ध गराउँदै आएका छ । फोटोकपी गरेको प्रति पेज १० रुपैयाँ लिने गरेका छन् ।
एक साताअघि बाहुली गाडमा आएको बाढीले विद्युतको नहर र पावर हाउस क्षतिग्रस्त भएपछि विद्युत सेवा बन्द छ । मार्तडीस्थित नेपाली सेना, प्रहरी, स्थानीय बासिन्दाको सयूक्त प्रयासमा बाँध मर्मत गरी सेवा सञ्चालनको प्रयास भएपनि प्रगति भने भएको छैन् । ‘झण्डै सय मिटर बाँध भत्केकाले विद्युत सुचारु गर्न अनिश्चित देखिएको छ,’ मार्तडीको बिजुली व्यवस्थापन गर्दै आएको त्रिवेणी सहकारी संस्थाका व्यवस्थापक पण्डितले भने । ०४३ सालमा निर्मित २ सय किलोवाट क्षमताको विद्युत हाल त्रिवेणी ऋण तथा सहकारी संस्थाको व्यवस्थापमा चञ्चालित छ ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon