 |
श्रावण ३२, २०७३- कप्तान पारस खड्काले विश्व क्रिकेट लिग च्याम्पियनसिपमा नेपालको शीर्ष चार भित्र रहने मौका अझै बलियो रहेको बताएका छन् । नेदरल्यान्ड्सविरुद्व दोस्रो खेलमा सोमबार आमस्ट्राडाममा म्यान अफ द म्याच हुँदै नेपाललाई १९ रनको विजय दिलाएपछि पारसले नेपाल शीर्षस्थ टोलीको लयमै रहेको बताएका हुन् ।
भिआरए मैदानमा टस हारेको नेपालले निर्धारित ५० ओभरमा ९ विकेट गुमाई २ सय १७ रन बनाएको थियो । पारसले नेतृत्वको उत्कृष्ट उदाहरण दिदै ८४ रन बनाई नेपाललाई मजबुत स्थितिमा पुर्याएका थिए । जबाफमा आएको नेदरल्यान्ड्सलाई ४८.३ ओभरमा १ सय ९८ रनमा रोकी नेपालले एकदिवसीयमा एउटा उत्कृष्ट विजय हात पारेको हो ।
२०१५ देखि सुरु भई २०१७ सम्म चल्ने च्याम्पियनसिपमा नेदरल्यान्ड्सलाई पराजित गर्ने नेपाल पहिलो टोली हो । शनिबार पहिलो खेलमा नेपाललाई सजिलै ७ विकेटले पराजित गरेको नेदरल्यान्ड्स ८ खेलमा १२ अंक जोडी शीर्ष स्थानमा छ । नेपाल ६ अंकसहित ८ राष्ट्र सहभागी प्रतियोगितामा छैटौं स्थानमा छ । शीर्ष चार टोलीले २०१८ मा हुने एकदिवसीय विश्वकप छनोटमा प्रतिस्पर्धा गर्न पाउने छ ।
‘पहिलो खेलमा हामी जसरी कमजोर बनेका थियौं, त्यसअनुरुप नेपालले सानदार पुनरागमन गरेको छ, एउटा टिमका रुपमा हामीले राम्रो खेल्यौं । चाहिएको बेलामा सबैले राम्रो खेले,’ पारसले भने, ‘नेदरल्यान्ड्स जस्तो टोलीलाई हराउन सजिलो छैन, तर हामीले जहिल्यै राम्रो ब्याटिङ गर्दा जितेका छौं । आज पनि ब्याटिङ राम्रो गरेर जितेका हौं ।’
च्याम्पियसिपमा नेपालले पछिल्लो पटक नामिबियालाई दुबै खेलमा पराजित गरेको थियो । पछिल्लो खेलमा नेपालले विजय हात पार्दा शतक बनाएका पारसले भने, ‘च्याम्पियनसिपमा अझै तीन चरणको खेल बाँकी छ । हामी ती खेलहरुका लागि तयार भएर बस्नुपर्छ । सम्भवत हामीले अर्को खेल केन्यासँग ६ महिनापछि खेल्नुपर्छ होला घरेलु मैदानमा । नेपाली क्रिकेटको अहिलेको अवस्थामा खेल कहाँ हुने निश्चत छैन् ।’
पारसले आफू नेपाल शीर्ष चार भित्र पर्नेमा सकरात्मक रहेको बताए । ‘नेपाली टिमसँग क्षमता छ, तर त्यो क्षमतालाई प्रदर्शन गर्न सकेन भने केही हुदैन् । यो डिभिजन ३,४,५ जस्तो प्रतियोगिता होइन, एउटै खेलाडीले खेलेर जित्ने । सबै खेलाडीले उस्तै प्रदर्शन दिन सक्नुपर्छ । अवको बाँकी समय त्यही क्षमतालाई उजगार गर्नु हुनेछ । त्यसो भएमा हामी आगामी खेलहरु जितेर शीर्ष चारमा पुग्ने छौं ।’
नेपाल च्याम्पियनसिपका सुरुका चार मध्ये तीन खेलमा विजयको मुखमा पुगेर हारेको थियो । एयरमा स्कटल्यान्डसँग नेपाल अन्तिम क्षणमा ३ रनले पराजित हुन पुग्यो । त्यसपछि पपुवा न्यु गिनीसँग युएईमा नेपालले हातमा आएको दुबै खेल गुमाएको थियो । सोमबार विजय हात पार्दा त्यो सबै राम्रो अनुभव भएको थियो भन्ने प्रश्नमा पारसले भने, ‘हुनसक्छ, तर नतिजा आफ्नो पक्षमा आउदा सवै राम्रो देखिन्छ । नतिजा आएन भने के ठिक भएन भनेर विश्लेषण गरिन्छ । एउटा टिमको रुपमा हामीलाई के गर्नुपर्छ भनेर थाहा थियो ।’
९४ बलको बलको इनिङ्समा पारसले ७ चौका र एक छक्का प्रहार गरे । उनले सागर पुनसँग चौथो विकेटमा १ सय १८ रनको महत्वपूर्ण साझेदारी गरे । ब्याटबाट खासै योगदान दिन नसक्दै आएका सागरले ७८ बल खेली २ चौकासहित ४५ रन बनाए । यसअघि ज्ञानेन्द्र मल्ल ३९ रनमा आउट भएका थिए भने कप्तान विनोद भण्डारीले २ छक्कासहित १४ बलमा १७ रन बनाए ।
पारस मैदानमा छाउनेक्रममा जारी रहेपछि स्टेफन मेबर्ग ८, माइकल रिपोन ७ र वेस्ली बारेसी ६ रनमा पवेलियन फर्किसकेका थिए । मेबर्ग एज लागि पारसको बलमा विकेटकिपर राजु रिजालको हातबाट राम्रो क्याच आउट भए । पारसले दोस्रो स्लिपमा दर्शनीय क्याच लिएपछि सोमपाल कामीले रिपनलाई पवेलियन फर्काए । बारेसीलाई पारसले राजुकै हातबाट क्याच गराए ।
म्याक्स ओडोओड र रोइलोफ भान डेर मेर्वेले केही ढिलो खेले पनि चौथो विकेटमा ८२ रनको साझेदारी गरी नेदरल्यान्ड्सलाई खेलमा फर्काएका थिए । भान डेर मेर्वेले ५६ रन बनाए । दक्षिण अफ्रिकाबाट १३ एकदिवसीय अन्तर्राष्ट्रिय खेलिसकेका भान डेर मेर्वेले ६१ बलको इनिङ्समा ४ चौका र १ छक्का प्रहार गरेपछि सोमपाल कामीको बलमा राउन्ड द लेग बोल्ड भए ।
४४ रन बनाएका ओडोउडलाई शक्ति गौचनले वाइड बलमा स्टम्प आउट गराए । टिम ग्रुइजटर्स र टिम भान डेर गुगटेनले क्रमश: ४४ र ३६ रन बनाई नेपालको हातबाट लाने प्रयास गरे पनि बसन्त रेग्मी र सोमपालको अनुभवी बलिङले नेपालले स्मरणीय विजय हात पार्यो ।
प्रशिक्षक जगत टमाटाले पहिलो खेलको सबै कमजोरीलाई बिर्सेर नयाँ रणनीतिका अनुसार खेलेको र त्यसमा नेपाल सफल भएर विजय हात पारेको बताए । नेपाल शनिबार पहिलो खेलमा ९४ रनमै अलआउट भएको थियो, जुन लिस्ट ‘ए’ मान्यता खेलमा नेपालको न्युन स्कोर थियो ।
‘ब्याटिङमा हामी सुरुआतमा टिकेर खेल्ने भन्ने थियो, १० ओभरसम्म कुनै विकेट नगुमाउने रणनीति थियो, १ सय ८० रनभन्दा माथि बनाएमा खेल जित्न सकिन्छ भन्ने थियो,’ टमाटाले भने, ‘जुन हिसाबमा विकेटमा टर्न भइरहेको थियो, हामीले स्पिनरको सहयोगमा खेल जित्छौं भन्ने थियो । तर सम्रगमा भन्नु पर्दा हामीले सबैबत्र क्षेत्रमा राम्रो गरेर खेल जितेका हौं ।’
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon