 |
भाद्र ८, २०७३- भारतमा पक्राउ परेकी कोकिन भरियाको बयानको आधारमा काठमाडौंको ठमेलमा बसेकी बोलेभियन महिला पक्राउ परेकी छिन् ।
कोकिन बोकेर इथोपियाबाट दिल्ली हुँदै काठमाडौं आएकी बोलेभियन महिला तोदोविच गोन्जालेजलाई लागुऔषध नियन्त्रण ब्यूरोले पक्राउ गरेको हो । प्रहरीले उनलाई पक्राउ गरे पनि कोकिन भने फेला परेन । कोकिन भारतीय भरियाले बोकेर लगिसकेका थिए ।
तीन किलो कोकिन बोकेर भारत जाँदै गरेकी नागाल्यान्डकी रोजी खासुङ भारतको बेहलियामा पक्राउ परेपछि गोन्जालेजको बारेमा सूचना आएको थियो ।
ब्यूरो स्रोतका अनुसार भारतमा पक्राउ परेकी रोजीले बयानमा नेपालको काठमाडौंमा रहेकी एक महिलाले आफूलाई सो कोकिन दिएको खुलाएपछि भारतको लागुऔषध ब्यूरोले नेपालको लागुऔषध ब्यूरोलाई जानकारी गराएको थियो ।
रोजीले आफू स्थलमार्ग हुँदै काठमाडौं गएर ठमेलको काठमाडौं सिटी होटलमा बसेको र त्यही होटलमा २०१ नम्बरको कोठामा बस्ने महिलाले कोकिन दिएपछि भदौ ७ मा फर्किएको बयान दिएकी थिइन् ।
सूचनाको आधारमा ब्यूरोको टोली ठमेलको कोठमाडौं सिटी होटलको २०१ नम्बरको कोठामा पुग्दा गोन्जालेज फेला परेपछि प्रहरीले उनलाई पक्राउ गरेर हिरासतमा राखेको छ ।
अधिकांश कोकिनका भरिया काठमाडौंमा पक्राउ पर्ने गरे पनि गोन्जालेजको बारे भने ब्यूरोले जानकारी पाउन सूचना पाउन नसक्दा कोकिन भारत पुग्यो ।
भारतमा कोकिनसहित पक्राउ परेकी रोजीले खुलाएको सूचना बेलैमा नेपालको प्रहरीले पाउँदा बोलेभियन महिला स्वदेश फर्कन भने भ्याइनन् ।
पक्राउपछि उनको विवरण हेर्दा उनी भदौ ५ मा ब्राजिलबाट दिल्ली हुँदै हवाईमार्गबाट काठमाडौं आएको खुलेको थियो । उनी कोकिन बुझाएपछि लामै समय काठमाडौंमा बस्ने योजनामा थिइन् । ब्युरो स्रोतका अनुसार उनी अझै १३ दिन काठमाडौंमा बस्ने योजनामा रहेकाले यो बीचमा पुन: अर्को खेप कोकिन काठमाडौं आउने प्रहरीको आशंका छ ।
ब्यूरोले साउन २६मा तीन किलो ५४ ग्राम कोकिनसहित बोलेभियन महिला रोजी गुड्डी र थाइ महिला वारान्या काउपिकुललाई पक्राउ गरेको थियो ।
रोजी वारान्याको अनुसन्धानमा उनीहरुलाई ब्राजिलमा रहेका बोलिभियन नागरिक क्लाउडो निग्रो र नाइजेरियन रेम्मीले नेपाल पठाएको खुलेको थियो ।
अनुसन्धानमा संलग्न प्रहरी अधिकारीले रोजी र गोन्जालेज एकै समूहका सदस्य रहेको आशंकामा अनुसन्धान भइरहेको छ ।
पछिल्लो समय कोकिन तस्करीमा सक्रिय नाइजेरियन समूहले ब्राजिल र पेरुको कोकिन अमेरिकी र युरोपियन मुलुक पुर्याउन नेपाललाई ट्रान्जिट बनाउने गरेका छन् ।
पेरु, ब्राजिल, भारत, थाइल्यान्ड, मलेसिया र पाकिस्तानमा रहेका नाइजेरियाली समूहले विभिन्न देशका सहयोगी परिचालन गरी हवाईमार्गबाट कोकिन नेपाल भित्र्याएर यहाँबाट स्थल र हवाईमार्ग हुँदै युरोपियन र अमेरिकी मुलुक पुर्याउने गरेको ब्यूरोको अनुसन्धानमा खुलेको थियो ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon