 |
श्रावण २५, २०७३- कांग्रेसको १३ औं महाधिवेशनमा देखिएको ध्रुविकरणको छायाँ भातृसंस्था नेविसंघमा पनि देखा परेको छ । कांग्रेस सभापति शेरबहादुर देउवा, बरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौला नेविसंघमा आ-आफ्नो बर्चस्व कायम राख्न उद्दत भएपछि उद्घाटन भएको दुई दिनसम्म पनि बन्दसत्र चल्न सकेको छैन ।
विवादको मूख्य चुरो विधिवत् महाधिवेशन नभईकनै भागबण्डाका आधारमा छनोट भएका ११ जिल्लाका प्रतिनिधिको बिषय बनेको छ । नेविसंघ अध्यक्ष रञ्जित कर्ण र ऋषिकेशजंग शाह समूहबीच अधिवेशन नभएका ११ जिल्ला र स्ववियू निर्वाचन नभएका क्याम्पसमा भागबण्डामा आधारमा प्रतिनिधि छनोट भएको थियो । कर्ण पौडेल पक्ष र शाह देउवा पक्षीय हुन् । सिटौला पक्ष यी दुई पक्ष (देउवा र पौडेल) बीच भागबण्डाको आधारमा आएका प्रतिनिधिलाई मान्यता दिन नहुने पक्षमा छन् । विधिवत् महाधिवेशनबाट प्रतिनिधि छनोट गर्नुपर्ने माग राख्दै आमरण अनशन बसेका सिटौला पक्षीय विद्यार्थी नेताहरुले आफूहरुलाई ३३ प्रतिशत हिस्सा दिइनुपर्ने माग राखेका छन् ।
विधिवत् महाधिवेशनकै माग राख्दै पौडेल निकट नेविसंघका पूर्व अध्यक्ष महेन्द्र शर्मा पक्षका विद्यार्थी पनि आमरण अनशनमा छन् । महाधिवेशनस्थल भृकृटीमण्डपमा मंगलबार दिनभरजसो नाराजुलुश चलेको थियो । बन्द सत्र तत्काल सुरु गर्न माग राख्दै विद्यार्थीहरुले नाराजुलुश गरेका थिए । सभापति आंकाक्षीहरुले भने आ-आफ्नो पक्षमा माहोल बनाउनका लागि पनि जुलुश निकालेका थिए । सभापतिका आकांक्षी क्षितिज भण्डारी र कुन्दन काफ्लेको समूहबीच केहीछिन तनावको स्थिति भएको थियो । काफ्ले नेतृत्वको विद्यार्थी समूहले बन्द सत्र सुरु गर्न माग राख्दै भृकृटीमण्डप भित्र छिर्ने प्रयास गर्दा प्रहरीसँग पनि केही झडप भएको थियो ।
११ जिल्ला र क्याम्पसका समेत गरी करिब १ हजार प्रतिनिधिमा विवाद देखिएको छ । यी प्रतिनिधि नै निर्णायक बन्न सक्ने भएकाले पार्टीभित्रको तीनै पक्ष यसलाई आफूतिर तान्ने कसरतमा लागेका हुन् । समझदारीका लागि सभापति देउवाले आफ्नो, पौडेल र सिटौला पक्षलाई ३०/३० प्रतिशत र महेन्द्र शर्मा समूहलाई १० प्रतिशत दिने प्रस्ताव गरेका थिए । तर, पौडेल समूहका विद्यार्थी नेताहरुले ५१ प्रतिशतको अडान राखेपछि मंगलबार बेलुकासम्म पनि समझदारी जुट्न सकेको छैन ।
नेविसंघको विवाद मिलाउनका लागि प्रकाशरण महत नेतृत्वको निर्देशन समितिमा दिनभर वार्ता भए पनि सहमति बनेन । समितिमा संयोजक महतका अतिरिक्त नेविसंघका पूर्वअध्यक्षहरु गुरु घिमिरे, गोविन्द भट्टराई, किशोरसिंह राठौर र प्रदिप पौडेल सदश्य छन् ।
निर्वाचनमा सिटौला पक्षले देउवा पक्षसँगै गठबन्धन गर्ने संभावना भएकाले पौडेल पक्ष सिटौला समूहलाई ३० प्रतिशत दिन तयार देखिएको छैन । ‘मिलाउने प्रयास जारी छ । आज रातभर मिलाएरै भए पनि भोली निर्वाचनको प्रकृया सुरु गराउने पक्षमा छौ,’ निर्देशन समिति सदश्य गोविन्द भट्टराईले भने । उनले सहमति हुनै नसक्ने अवस्थामा ११ जिल्लाको विवाद छाडेर भए पनि निर्वाचनमा जाने बताए । निर्देशन समिति तहमा सहमति नजुटेमा बुधबार शीर्ष तहमा छलफल हुने भएको छ ।
महाधिवशेन लम्बिदा आर्थिक व्ययभार समेत थपिएको छ । देशभरबाट आएका ३३ सय प्रतिनिधिलाई आवास तथा भोजनका लागि दैनिक ४३ लाख रुपैयाँ खर्च भएको छ । संघले आवास तथा भोजनका लागि बुधबार सम्मको मात्रै व्यवस्था गरेको तयारी समितिका सदस्य मोती भण्डारीले बताए ।
नेविसंघका पूर्वअध्यक्ष एवं कांग्रेस केन्द्रीय सदस्य ज्ञानेन्द्रवहादुर कार्की संस्थालाई नै कमजोर बनाउनेगरी महाधिवेशन रोक्न नहुने बताउँछन् । ‘महाधिवेशन असफल भए यसको असर कुनै नेता विशेषलाई भन्दा संगठनलाई पर्छ,’ कार्कीले भने, ‘नेविसंघ भनेको घर/घरमा फैलिएको संस्था हो । यसलाई कमजोर बनाउँदा कांग्रेसकै संगठन कमजोर हुन्छ ।’ अर्का पूर्व अध्यक्ष एवं कांग्रेस केन्द्रिय सदश्य धनराज गुरुङ विधि, पद्दतिबाट निर्णय नगरेका कारण समस्या आएको बताउँछन् । ‘निर्देशन समितिका बसेका साथीहरुले पनि विधि, पद्दतिबाट निर्णय गर्नुपर्छ, मासुको भाग लगाएजस्तो गर्न खोजेर समाधान निस्किदैन’ गुरुङले भने ।
अनसनकारी सापकोटा गम्भीर
विधिवत् महाधिवेशन गराउन माग राख्दै आमरण अनशनमा बसेका मध्ये गणेश सापकोटाको अवस्था गम्भीर बनेको छ । मोडल अस्पतालमा उपचार गराईएको सापकोटालाई आईसियूमा राखेर उपचार गराउनुपर्ने भएपछि मंगलबार राति ओम अस्पताल लगिएको छ । आमरण अनशनमै बसेका अर्का विद्यार्थी रत्नहरि ढुंगेललाई भने मोडलमै उपचार गराइएको छ । उनीहरु ८ दिनदेखि आमरण अनशनमा छन् ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon