 |
भाद्र १२, २०७३- कोरियामा छुसक पर्व नजिकिँदै गर्दा नेपाली संघसंस्थालाई उतिकै चटारो भएको छ । सेप्टेम्बर १४ देखि १६ सम्म मनाइने यो पर्वका लागि ४ वटा संस्थाले नेपाली सांस्कृतिक कार्यक्रम गर्न लागेका छन् । यति बेला उनीहरू हलदेखि कलाकार, टिकट, प्रचारप्रसार, यातायात व्यवस्थापनसम्म लागि परेका छन् । आयोजकले एउटा सिजनको यो पर्वका लागि दुई दर्जनभन्दा बढी कलाकारसँग सम्झौता गरिसकेका छन् । केही संस्थाहरूले भने अधिवेशन, भेटघाट, चिठ्ठा, रमाइलो साँझजस्ता कार्यक्रम तर्जुमा गरिरहेका छन् ।
कोरियामा अहिले ४० हजार बढी नेपाली छन् । उनीहरूमध्ये अधिकांशले ‘नेपथ्य ब्यान्ड’ को लाइभ प्रस्तुति हेर्ने आफ्नो रोजाइ रहेको प्रतिक्रिया दिएका छन् । नेपाल तामाङ संघ कोरियाले सेप्टेम्बर १५ मा ‘नेपथ्य–कोम्हेन्दो डाङ’ (नेपथ्य र टोटलाको फूलको कोसेली) आयोजना गर्न लागेको हो । ब्यान्डले ‘केबीएस एरिना’ हलमा आफ्नो प्रस्तुति दिने भएको छ । गत वर्ष मात्र स्थापना गरिएको यो अन्तर्राष्ट्रिय स्तरको हल हो । यसमा विश्वस्तरीय साउन्ड सिस्टम, लाइट र फुल एयर कन्डिसनको सुविधा छ । संसारमै चर्चा कमाएका ‘ओपन गाङनम स्टाइल...’का र्यापर गायक साई लगायत ‘बिग बेङ’, ‘सुपर जुनियर’, ‘एक्सो’, ‘गर्लस् जेनेरेसन’, ‘वन्डर गर्लस्’ जस्ता नामी म्युजिक ब्यान्डहरूले यो हलमा प्रस्तुति दिइसकेका छन् । यसअघि नेपथ्यले विश्व प्रख्यात ‘बेम्बली एरिना’ हलमा प्रस्तुति पस्किसकेको छ ।
कोरियाको यस्तो अत्यन्त सुविधाजनक अन्तर्रार्िष्ट्रय हलमा नेपाली कलाकारहरूले भने पहिलोपटक प्रस्तुति दिन लागेका हुन् । नेपथ्य लाइभ कन्सर्टका लागि आयोजकले हजारौं दर्शक उतार्ने तयारी गरिरहेको छ । दर्शकहरूको मागलाई ध्यानमा राखेर टिकट वितरण तीव्र बनाइएको संघका महासचिव मेघप्रसाद वाइबाले बताए । उनका अनुसार विभिन्न सहरहरूबाट बसको व्यवस्थासमेत गरिएको छ । यहाँ रहेका दर्शकहरूको भावनालाई समेट्न नेपथ्यले पनि आफनो नयाँ पुराना गीतहरू ‘तालको पानी...’, ‘छेक्यो छेक्यो...’, ‘जोमसोमै बजारमा...’, ‘भेडाको उन जस्तो...’, ‘सा कर्णाली...’, ‘जीवन हो घामछाया...’, ‘रेशम...’ र भर्खरै सार्वजनिक नयाँ गीत ‘कोसीको पानी...’ जस्ता लोकप्रिय गीतसंगीत प्रस्तुत गर्ने तयारी गरिरहेको छ । ब्यान्डका मुख्य आकर्षण रहेका गायक अमृत गुरुङलाई ड्रमसेटमा ध्रुव, किबोर्डमा सुरज, बेस गितारमा सुविन, गितारमा निरज र मादलमा शान्तिले सघाउने बताइएको छ ।
सेप्टेम्बर १५ कै दिन ‘कन्काई सांगीतिक सौगात’ झापा मिलन समाजले गर्न लागेको छ । समाजले कोरियामा सञ्चालन गरिरहेको ‘पाथिभरा हाउस’ को व्यवस्थापन गर्न यो सांस्कृतिक कार्यक्रम आयोजना गरेको हो । यसका लागि समाजले गायक, दीपक लिम्बू, अल्मोडा राना उप्रेती, प्रमोद खरेल, गायिका इन्दिरा जोशी, नायिका प्रियंका कार्की र हास्यकलाकार विल्सनविक्रम राईलाई आमन्त्रण गरेको छ । यो सौगात कोरियाकै पुरानो मानिने यन्से विश्वविद्यालय हलमा गर्न लागिएको हो । समाजले कोरियामा आपतवपतमा परेका नेपाली कामदारका लागि ‘पाथिभरा हाउस’ नामक सेल्टर सञ्चालन गर्दै आएको छ । यसै दिन बागलुङ सम्पर्क समितिले पनि ‘धौलागिरि सांगीतिक सौगात भाग ३’ गर्न लागेको छ । समितिले गायक अनिल सिंह, योगेश काजी, प्रकाश सपुत, गायिका मेलिना राई, प्रीति आले, नृत्यकार रिमा गुरुङ र हास्यकलाकार जितु नेपालसँग सम्झौता गरिसकेको अध्यक्ष याम श्रीश मगरले जानकारी दिए । कार्यक्रमको उद्देश्य जिल्लाको दुर्गम क्षेत्रमा स्वास्थ्य र शैक्षिक विकास गर्न रहेको छ ।
छुसक पर्वको पहिलो दिन सेप्टेम्बर १४ तारिक जिल्लाका असहाय बालबालिकाको सहयोगार्थ चितवन सम्पर्क समितिले पनि ‘चितवन धमाका’ प्रस्तुत गर्ने योजना बनाइरहेको छ । यसमा गायक राजु लामा, खुमन अधिकारी, गायिका शान्तिश्री परियार, सन्जना श्रेष्ठ र हास्यकलाकार सुदीप क्षेत्री आउने भएका छन् । कोरियाली समाजमा ‘थ्यांक्स गिभिङ डे’ मानिने छुसक पर्वमा तीन दिन बिदा हुने भएकाले विभिन्न क्षेत्रमा रहेका नेपाली कामदार भेटघाट, रमाइलो गर्ने गर्छन् ।
|
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
ConversionConversion EmoticonEmoticon